Part 2 | كيف أستمر بالرياضه والتغذيه ..!

اهلا اهلا 

تدوينة اليوم جدا جدا خفيفه واخف من الخفيف نفسه

ولكن اهم من اي موضوع رياضي بالنسبه لي

وتعمدت اختار اول ثلاث اجزاء للنمط الصحي تكون مجرد كلام يولد قناعه اكثر من اني اصدمك بكلام علمي بحت
غير اني ناويه اقرقر واسولف عليكم 
😆 

.

طبعا دائما لما نقرر نسوي رياضه فجاءه تحصلوننا باول اسبوع ملتزمين اشد الالتزام ووش زيننا 

يالله لك الحمد لكن مايمر اسبوع بالكثير الا والنفسيه طاقه من الملل والطفش

وتحسين أن الوضع " سسسسسستوب "

تطق النفسيه فيك وتحسين أن فيه مانع بينك وبين نفسك حتى وأن سويتيها , سويتيها بالغصب مو من راضاك انتي
وهالكلام ياما صار وصار معي بالتمارين والرياضه .
🙌

فما بالكم بحال التغذيه من ثاني يوم الوضع يتدحدر بشكل كبير جدا

وكل هالاشيائ عائق كبير من انه يخلينا

نستمر بنمط صحي متزن .

وافهمو معنى نمط صحي وسبب تسميتي له .. النمط اسلوب حياة دائم يعني معيشه لعمرك بطريقة تعامل تخصك انتي .. والصحه اساس القوه لسلامة جسمك وبدنك وعقلك ونفسيتك  .

فما ينفع ابدا تسوين رياضه بتخطيط ثلاث شهور او فتره زمنيه بسيطه وتسحبين 
خلي النمط الصحي لك عمر 

واساساَ استغرب من تعليق اذا انكتب لي : انا لي شهرين اسوي رياضه 

( ولكن ماشفت نتايج ابداً )
😩

من قال أن الغرض من النمط الصحي ينحصر على جسم منحوت ومخصر !

او ابي اسمن و ابي أنحف عطينا الخلاصه وبس .

💀💀💀💀💀💀

الموضوع عميق وبعيد عن التعليقات اللي واجهتني بشكل كبير جداً

أنتي كأنسانه لما تقررين انك تغيرين اسلوب حياتك بعادات ايجابيه

سواء بالدين .. بالاخلاق .. بالحياة الاجتماعيه والسلوكيه ...الخ

وخلونا مركزين على نقطة عادة ( النمط الصحي )

💪
انتي قررتي تضيفينه بحياتك لأنك انتي بنفسك مو راضيه بوضعك المتعايش فيه 

يعني عاجبك أنك تشربين ببسي وانتفاخات بطنك من بعدها ضاربه ! جايز لك الوضع بعد كل اكله رئيسيه من تخمه وكسل وخمول و دوران بدال ما تنشطين وتكسبين طاقه .

حتى مصدر روائح الجسم اللي نشتكيها بالغالب تكون من الاكل اللي ناكله!
😓

ما حسيتي بالخوف على صحة عمرك وقوتك أنها ممكن بيوم وليله تنقلب بسبب سوء تغذيتك

او ماقد درستي او سمعتي أو قريتي عن أمراض سوء التغذيه ؟

خاصة مرض السكر و الضغط وتصلب الشرايين وضغط الدم وامراض كثيره , ومن خلال دراستي لها

جاني خوف كبير جدا على عمري ان هالشي يأثر علي وعلى عيالي بالمستقبل  
💔💔💔💔

هالصحه شي غير مأمن علينا .. والواحد من عمر صغير صار ينمرض 

صار يتعب .. صار يتحسس من اي شي وهو توه بالبدايات كيف لا صار بعمر كبير

من بيوفر عليه صحته المعدومه ؟

اختيارك لاي عاده خليه خيار واضح وضوح الندى 

والاهم مقتنعه فيه ماهو مع الخيل ياشقراء .. حتى لو النمط الصحي ما نتي مقتنعه فيه 

محد بيغلطك وبيحسسك بالذنب عيشي بالاسلوب القريب لك

واللي يحسسك بالحياة الحلوة والاصح بنظرك .

كيف ادخل عادة الرياضه والتغذيه الصحيه بحياتي ؟

احياننا يقولون لجل تستمرين بالرياضه تحتاجين عزيمه .. اراده .. صبر !
اوكي هي ممكن شبه ما صحية 
 ولكن لاجينا نطبق الواقع نشوف شي ثاني
من السهل حيل حيل حيل .. اننا نقنع انفسنا بشغله جديده بحياتنا ولكن من الصعب جدا اننا نطبقها وندخلها بالروتين .
على سبيل المثال :
الاغلبيه يسمع اغاني وعارف حكمها الشرعي ودرسها دينياً بمناهجنا
ويظل مستمر يسمع الاغاني وهو عارف الحكم لها ؟ ومع ذالك يظل مستمر .
ممكن هالشي له علاقة بالبرمجه العصبيه للنفس (افكر اني اسوي بحث عليه لاتخرجت 😎 ) وهو أن اغلبية الناس
يربطون الضيقه والحزن بحياتهم العامه ومجرد ما يسمعون اغنيه ينطربون
او يفرحون معاها , فهم يتبرمج عندها لا اراديا ان الاغاني تطيب الخاطر 
فالوضع صار برمجة دماغ وعاده جسديه  , هل هم راضين بالوضع داخلياً او غير راضين ؟
💔 
لاحظوا انا ما عززت السلوك او شجعت عليه نهائياً
لكن تكلمت من وجهة نظر ثانيه بعيد البعد عن الناصحين بطرق الترهيب والتخويف و التوعد بنار جهنم 

" طبعا مجرد كلام وتوقع  مني لا اكثر "
😜😜😜  
مثلها مثل التغذيه او الرياضه .. تحصلين البعض ياكل اكلات تضر عمره من سكر
وملح ودهون وزيوت مهدرجة ويعرف انها بيزيد وزنه وبينعكس على حالته الصحيه .
ومع ذالك ياكل ويبلع ما لذ وما طاب ويمحي ابو الضمير
بشاهي اخضر
😂  
فكرة أن المعلومه وصلتنا او تثقفنا بالشي المطلوب هو غرض ما يكفي
لان موضوع الاستمرار موضوع
( قوة جسد وتحمل )
يبيلك تكافحين وتستمرين عشان تسوين اضافة عاده حلوة لحياتك 
مهام كانت العاده كيف تضيفين العاده الصحيه الرياضيه لروتينك بدون ضغط !

 

التدريج 

 اغلب البنات والسبب انهم ما يستمرون بالرياضه والتغذيه هم انهم يكلفون انفسهم بالبدايه بشكل كبير جداً .. وخاصة انا اتذكر اول ما قررت اسوي رياضه جلست اسويها ساعة ونص وحطيت تمارين مكثفه جداً ؟ طبعا ما طولت وسحبت على الرياضه شهر تقريبا لانيي فجعت عمري بالنظام الجديد
التدريج بالشي هو من اهم الاسباب اللي ممكن انها تخليك مستمره .. شي طبيعي وبديهي جداً انك تعيشين عمرك كله بدون رياضه او حركة جسديه فبتشوفين البدايه شي صعب .
وعشان تدخلين الرياضه بالتدريج خلي اول شهر بحياتك للرياضه عباره عن مشي فقط .
بسسسسس مشي .. هروله .. ركض خفيف
تدرون ليه ؟ عشان يتعود جسمك اولاً وتكتسبين شوية مرونه .. وعشان يتبرمج دماغك على اوقات الرياضه ويحس ان فيه شي ناقص بيومك لو ماسويتيه وهو الرياضه .. وعشان بالبدايه تستسهلين الوضع على عمرك وما تحسين بثقل .
بس امشي من 15 -30 دقيقة يوميا .
بكذا انتي تضمنين استمرايتك بنسبة 60%
الشهر اللي بعدها دخلي تمرين واحد الى تمرينين فقط واستمري فيه للشهر الثالث .. اذا جاء الشهر الثالث سوي نفس الشي دخلي من تمرينن الى ثلاثه , ووقتها بتشوفين ان الرياضه صارت جزء كبير من يومك .

نفسها نفس نظام التغذيه جربي الشهر الاول يكون فقط فطورك صحي ... بعدها الشهر الثاني فطورك وغداك صحيين .. بعدها الشهر الثالث وجباتك الرئيسيه صحيه والسناك يكون لعب فيه شوي
كذا بقلاوتين مع قهوه .. ثلاث حبات كوكيز براوني مع عصير
 " لان الحرمان يولد رغبه كبيره انك تقطعين اللي بديتي فيه "


.
.
ممكن بعضكم بيقول يوه شغله ثلاث شهور وتدريج ؟ ولكن صدقوني اشوفها الطريقه الاقرب عشان تستمرون وتحسون ان الوضع صار عاده .

التحفيز 

اتذكر مره بالانستقرام طلعت لي صورة ان فيه بنت تسوي رجيم ونزل وزنها ويوم نزل قررت تكافى عمرها بوجبه من كنتاكي ؟ 
 😂😂😂😂
 خوش مكافئه والله .. هو المفروض لو انتي مستمره بعاده صحيه وحابة تكافئين نفسك
جربي كل اسبوع تروحين للسوبر ماركت تتقضين بشي قليل جدا لأكلك اشوف هالشي 
يعطي تحفيز جدا قوي ويخليني اشتهي اطبخ اطباق ووصفات جديده 

عاد يوه ياللحم والسمك يخلوني اعيش شعور الحماس المطبخي لسنه قدام 
 " خفي علينا ياجويس العالم " 😂 

...
 
او ممكن احيانناً اروح لمطعم واطلب وجبه بخيارات صحيه قدر الامكان احس اني غيرت جو عن البيت
ورفهت عن عمري

مب لازم تكون صحية ميه بالميه 
ولكن اقلها غيري جوي باعتدال ... وعن نفسي انا نظامي ما يحتاج ليوم مفتوح فيه ترليون سعره حراريه استهلكها
ولكن بداله احط خيارات يوميه غير صحيه ما تاثر بشكل كبير على صحتي
مثلا  :
حليب الشاهي اللي تنقدون دايم علي فيه , مثل بقلاوتين مع قهوه تشوفونها بالسناب او كت كات , مثل ربع ملعقة سكر بني مصنع
او مثل لااشتهيت وجبه او حلى 
ببالي اروح اكلها
👏
لاني ما اطيق نظام الحرمان نهائيا او اني اكبت شهيتي وخاطري باكله لين مالله يفرجه بشي   
او اذا جت عزيمه تكلفوا ناس بضيافتهم اردهم لاني صحيه او مسويه رجيم ! احسها حركة تفتقر الذوق والادب 
, وش يضرني لاجاملت لخاطر تعبهم بقطعة حلى ماني مايته ابداً 
 وطبعا جلست فتره قصيره  من نظامي احسب  بالاسبوع للبدائل الضاره اللي كنت اكلها بالبيت او المناسبات
و بالكثير كنت استهلك الف وخمسمية
الى 300 الاف سعره حراريه بالاسبوع ( يعني اهون من تخبيص اليوم المفتوح بالنسبه لي )

وبكلمكم لافضيت عن نظام تغذيتي بشكل اوسع 
لأن نظامي خفيف ومتماشي مع حياتي بشكل كبير جدا .

💜💜💜💜💜💜💜

ونسيت لا اذكركم بشغله اشوفها تزيد تحفيز النفس للرياضه  وهو لو وصلتي لنص القياس او الميزان او الشكل اللي حابته والتزمتي بتغذيتك 
تشترين ملابس رياضيه .. او عده وادوات رياضه 
" هالشي بيعطيك دافع وقوه انك تستمرين "
💪💪💪💪💪💪


.
.


  قربي عمرك باشخاص نمطهم صحي

ما اقولك كوني صداقات مع بنات صحيات نهائيا .. ولكن اكبر شي ممكن تدخلين نفسك فيه حاليا هم الانستقرام والسناب شات ياكثرهم كثراه وان بغيتوا بيوم اعلمكم على حسابات صحية قولولي  .
😅
ينزلون وصفات صحيه .. مقططفات من تمارينهم .. صور من اجسامهم ( العيال ) قصص تجاربهم 
اذا راحو مطاعم تشوفين وتاخذين من فكرة بدائلهم الصحيه 
تتحمسين اذا شفتي احد ياكل مثل أكلك واحيانناَ تتاثرين معهم
😆
يعني انا حاليا اتابع سواليف هيون واشوفها كل يوم تشرب عصير شمندر 
فزيت اليوم ورحت اشتري شمندر مع اني قد جربت عصير شمندر وما جاز لي طعمه 
بس اشوفها كل يوم تسويه لين ما دخل راسي غصب .

بعد فيه وحده اموت على سناباتها اسمها  امل لايف  تطبخ دايما سالمون وتصبيرات صحيه 
تخليك تقومين بنفسك تسوينها 

واتذكر قبل فتره شفت صورة بالاكسبلور عن وحده تسوي بطاطس مشوي
قمت وتحمست اسوي لعمري 🙆
فالموضوع جداً جميل ويحمس  
فحاولي قد ما تقدرين انك بين فتره والثانيه تفلترين اللي تتابعينهم لانهم ياثرون على حياتك بشكل كبير .. ابتعدي عن سخافات وتفاهات بعض الاشخاص بطروحاتهم واستعراضهم وكثفي نظرك للشي الحلو والمهم عندك 
وخلي وقتك ثمين لشي يستاهل .




💓💓💓💓💓💓💓💓💓💓💓💓💓💓💓💓💓💓💓💓💓💓💓

الى هنا اقدر اقول اني خلصت من الجزء الثاني لنمط الصحي 
بحمد الله .. 
حيل حيل وسعت صدري بكتابته حسيت ان الموضوع ونيس .

اي اقتراح ؟ للجزء الثالث ارحب فيه والله .

انتهى 
Joyce