Part 3 | قياسات الجسم ومثالية الوزن + جدول قياسات مجاني



اهلا اهلا

رجعت لكم من جديد بطرح مخصص لقياسات الجسم و متى اقول أن جسمي مثالي وممتاز 
او متناسق .
بالاغالبيه اشوف ناس لما تحكم على صحة وزنها او الجسم بالصحه وأنه مثالي
تقولك اذا طولك 
160 .. خلي وزنك 60 
واذا طولك 
165 .. خلي وزنك 65
( يعني ينسبون الطول لنفس الوزن ؟؟ )
 
هو على اي اساس طلعت صحة هالقاعده للاجسام من قياس جسمنا بالكيلوجرام 
وربطه بالطول 
!!
لاني ولا ممكن بيوم من الايام اتبع هالطريقه لقياس جسمي 
بمدى مثاليته
وبفهمكم السبب لرفضي





في جسم الانسان كتلة عضليه .. وكتله دهنيه ما يفرق قياسها ابداً بنفس الميزان
ممكن اجيب لك شخصين بنفس الوزن والطول 
ذيك الاولى وزنها ستين وذيك الثانيه بعد ستين 
لكن وحده جسمها مشدود وصحي ومافيه ولا غلطه والثانيه ما تشوفين الا ترهلات زايده 
مع ان الطول والوزن نفس الشي
😳😳
السبب يرجع لنسبة الكتلة العضليه والدهنيه بالجسم 
لان البنت الاولى مشتغله بنظام معين لزيادة الكثافه العضليه من خلال التغذيه والرياضه
فتحصلونها شاطره باماكن الدهون وأبراز المناطق العضليه  
واخفاء ونحت بعضها .
فطلع لنا جسم ممتاز ( يموت .. يسفه .. يجننن .. يهبل )
بينما الثانيه كتلتها الدهنيه اكثف من الكتله العضليه واكلها غير صحي والحركه قليله
فالنتيجه بتكون سمنه زايده باحد المناطق وشحوم متراكمه
يعني تحصلون الزند " العضد " اكبر من اليد .. او البطن عندها انتفاخ وترهل زايد
وكله راجع من اسلوب حياتها وتعاملها لجسمها .
بالاكل والحركه 
" لان فيه اكل وفيه اسباب لزياده سمنة بعض المناطق "



حتى لاحظونا لاجينا نمدح جسم احد نقول له : جسم فلان حلو !
وكله دليل على أن تشكيلة الجسم اهم من مقياس الكيلوجرام
هذا غير انك مانتي ماشيه
 بكل مكان وانتي حاطه الميزان فوق راسك وبيعرفون انتي صحيه او لا
هم بيطالعون لك ككل فقط لاغير .

فاللي معتمده على الوزن حابه اقولك أن رقم الميزان للكيلو جرام رقم مُبهم للاسف 
ما يقيس نهائياَ صحة جسمك 
ولكن ما يدل على ان الميزان غير مهم ابداَ
هو بيعطيك مؤشرات تنبيهيه خاصه لو كان ببالك انك تكونين مخصره مايله للنحف او البدانه 
( طبعاَ بعض البنات تحب الجسم أنه يكون مايل للمربرب وبعضها تحبه للنحافه بس ماهو النحافه المرضيه والهزيله )
فاذا كان وزنك ستين مثلا 
تقدرين تحطين حد 65 للزياده .. او 55 للنقصان 
هالشي ما راح ياثر بشكل كبير حيل
والاهم يعطيك مؤشر بحال لو وزنك نزل للمعدل الغير طبيعي او ارتفاع لمعدل السمنه  
وعشان اختصر لكم هالمسأله 
عندكم موقع وزارة الصحه السعوديه يحدد لك الكتله في جسمك ويعلمك اذا كان وزنك 
تمام او الكتله غير طبيعيه اما نازله او مرتفعه 


وعندك موقع الدكتور سليمان الحبيب


موقع الطبي

وعن نفسي اشوف افضل موقع هو وزارة الصحة حيل دقيق جداً بالقياس 
.
اما بالنسبة لشكل الجسم اللي اميل له 
احب الجسم النحيل لكن المربرب والمدبدب في بعض الاماكن
وهالكلام لعام 2017 ترى ؟؟؟؟
لاني احتماليه اجيكم في رؤية 2030 بجسم كيم كارديشيان او انجلينا جولي 😂

جسمي مثالي !



محد بيحكم اذا جسمك مثالي او غير مثالي غيرك انتي 
لاني جدياً اتعجب من بعض البنات بالسناب شات ترسل صورة جسمها وتقول 
بالامانه جسمي تمام ولا لا ؟
😶😶😶😶
اوكي انا ممتنه بشكل كبير لثقتك بي ولكن مهما كان يظل فيه اختلاف بالاذواق 
ومفهوم الجسم الاصح بيننا .
فيه بعضهم يموت بجسم كيم كارديشيان وبعضهم يحب جنيفر لوبيز وبعضهم جيسيكا البا وبعضهم هيفاء وهبي وبعضهم مريام فارس
بس موضوعنا ماهو من الافضل منهم ؟
ونجلس نقيم الافضل 
موضعنا وش الجسم الافضل برايك انتي ماهو براي الناس وتحسينه قريب منك .. بالاضافه الى أن 
( المرايه ونظرتك للاجسام )
هم الشي الوحيد اللي بيحكمون بمثالية جسمك 
طالعي لجسمك بالمرايه وشوفي هو تمام او لا 
وش يحتاج تبرزين او تخفين .. واي عضله تكثفين جهودك عليها ؟ والعكس
فخليك من الميزان ومن مقايس الناس المثاليه للاجسام
وشوفي لـ " نفسك "
💜💜💜💜💜


قياسات الجسم بالسانتي متر





هالقياس دقيق جداً جداً عن قياس الكيلو جرام ويعلمك وينبهك بتغيرات جسمك بشكل 
اسرع 
واشوفه من الاشياء اللي زادت حماسي الرياضي 
لاني اسبوعياً ما ابالغ لو قلت اني اشوف تغيرات بجسمي وخاصة نهاية الشهر 
لاحظت جسمي فرق حيل حيل بدون ما انتبه 
او احس بعمري .
غير اني لو بعتمد بتغيرات جسمي بنظر العين ممكن احس بالاخفاق 
لاننا متعودين على انفسنا دايما فما نلاحظ الفروقات الا اذا جانا شخص وقال ( سمنان .. نحفان .. جسمك محلو )
لكن بالقياسات المتريه بتكونين متطلعه وعارفه بتغيرات جسمك 

خاصة للي يقولون لنا ثلاث شهور نسوي رياضه وما لاحظنا الفرق 
!!!!
صدقوني أن النتايج 
تجي بالتدريج وحبه حبه .. ومن الصعب جدا انك تلاحظينها بنظرك
 خلي معك الشريط وقيسي فيه جسمك 
قياساته صحيحه وثابته



( الصور من تصميمي الخاص .. الرجاء ذكر المصدر عند نقلها )

جيبي شريط قياس متري من اي محل خياطه بثلاث ريال بالكثير 
وبتشوفين فيه قياسين ... انتي اعتمدي قياس السانتي متر ابو ارقام صغيره
لانه دقيق جداً جداً
بعدها خوذي قياس لجسمك على معده فارغه اول ما تقومين من النوم 
وبدون ملابس لجل يطلع قياس حقيقي
من غير زياده .

بعدها اكتبي القياسات بورق لانك بتخزنين التغيرات وتشوفين مع الوقت اذا فيه خلل 
او ماشيه تمام بالموضوع 
والاهم تعرفين اي منطقه تكثفين عليها هالشهر خاصة منطقة البطن 
بتلاحظين انتفاخها لو لعبتي باكلك 
فهو يهدد احيانناً 


الجداول القياسية


 -

( الصور من تصميمي الخاص .. الرجاء ذكر المصدر عند نقلها )

+ بالاضافه الى أن القياسات لسانتي متر : يفضل انك تاخذينها بشكل اسبوعي 
والوزن وكتلة الجسم بشكل شهري لقياس مدى صحة جسمك .

💜💜💜💜💜💜💜💜💜💜

الى هنا اكون خلصت كتابة الجزء الثالث من النمط الصحي 
اتمنى ان التدوينه جازت لكم وافادتكم 
لاتنسون تدعون لي بالتوفيق لاني حاطه براسي مشروع من فتره طويله واتمنى انجزه هالفتره
اشوفكم على خير باذن الله 



Joyce 
انتهى



تعليقات

المشاركات الشائعة من هذه المدونة

Part 2 | كيف أستمر بالرياضه والتغذيه ..!

Part 6 | تمارين التقويه لزيادة قوة و كتله عضليه .