Part 5 | السعرات الحرارية ( الافضلية بالاكل ؟ ما تاكلينه او كم تاكلين )

السلام عليكم ورحمة الله وبركاته 

اليوم طرى على بالي اطرح موضوع يخص نظام 
و حقيقة السعرات الحرارية لأجسامنا من بعد ما حطيت 

صورة الزبيب بسنابي و انكتب لي تعليق : الزبيب يسمن او لا  !

ويا كثر ما تجيني اسأله من نفس الاطار : العصير ينحف ولا يسمن ؟ الفطور مرتين كل صبح يزيد وزن او لا ؟

 الاغلبيه رابطين صحتهم وتغذيتهم بعدد السعرات الحرارية .. ولكن هذا الشي تشوفون صح او غلط  

عن نفسي بتكلم بأيام اول ما بديت بنظام النمط الصحي كنت انسانه معقده بشغله السعرات

الحرارية وكنت اهتم كم الكميه اللي اكلها على فأيده الاكل 

لحد قبل سبع شهور قريت كتاب متعلق بالسعرات الحرارية وكان يقول انها خرافه  !!

مبدئيا استنكرت كلامه ولا ايدت الوضع , لاني اشوفها العد هو الخيار الأصح برائي

وأنه الطريقه الوحيدة اللي ممكن اتحكم فيه بوزني

. . .

بس بمجرد ما انتهيت من قراءة الكتاب استوعبت اني على خطاء كبير جداَ واني امشي بنظام معقد حرفياً

وهو نظام يعتمد على الارقام فقط وكم رقم استهلكته بيومي

صحيح اني حصلت نتايج ممتازة , ولكن بصعوبة  جداً ومعقده كنظام يومي

فاحصل نفسي ما ستمر يوميا بنظام الاكل والخبط و احوس مما تزيد حلطمتي على هالموضوع 

" ما كان فيه اتزان وانتظام بروتين اكلي "

اللي اتذكر اني كنت بشكل مستمر اتعرض لخيبات بمجرد معرفتي ان جسمي ووزني ما تحرك فيه ساكن وبكل شهر نفس الوضع اللي فات واشد

هالخيبات المستمرة جمدت طاقاتي وهزت ثباتي بكل نظام اطبقه مستحيل اتزن فيه نهائيا

فمن هنا بديت اعاني بشغله التغذيه بشكل متعب

💔

خلونا نكون واقعيين 

هل من المعقول لو اعطيتك كسرة كتكات فيها 150 سعره حرارية 

وقمت ورحت اعطيتك حليب طازج فيه 150 سعره حرارية 
 بيعطيك نفس الرقم لكن السؤال هل بيعطيك فائده صحيه ؟
والجواب أن الكتكات بيغذيك دهون وسكر فقط . بعكس الحليب راح يكسبك ويمد جسمك بالبروتين 
والكالسيوم والفيتامينات 
.

" لكن يظل سؤالي الاعمق : هل تشوفينه شي عادل ومتزن بنتيجة وزنك اخر الشهر .. ؟ علما ان الميزان يعطيك قيمه مبهمة ما يفرق بين العضل وبين كتلة الدهون وبين نفخة الجسم بالماء هو بيعطيك رقم و بيقول هذا وزنك   "

وهذا اللي خرب نظام الرجيمات والدايت والسعرات الحرارية اننا نتقيد بعدد محدود
 وضعيف بدون ما نعطي اهميه للشيء اللي ممكن نأكله بخيارات وفوائد ممتازة لصحتنا 

مو كل سعره حرارية هي صحية 

فيه سعره حرارية تعمل لصالحك , وفيه سعره حرارية تعمل لضدك 

وهذا الشي اللي شرحته بالجزء الثالث من النمط الصحي وقلت خيار جسمك خيارين : يا عضل وجسم مشدود , يا دهون وجسم مترهل .

مافيه حياد نهائيا بالموضوع حصرك للسعرات الحرارية واهتمامكم للرقم وكم باليوم استهلك ؟

هالشي يعتبر عاده غير صحية نهائيا 

وينطبق هالكلام على رجيم التمر او الماء او الاناناس .. تحصلونهم باليوم 
يأكلون 700 سعره ضعيفة جداً بالمحتوى  الغنى

و النتيجة عكسية فغالبا نشوف شعورهم تطيح .. حتى بهاء وجههم ينعدم .. غير الهزل الفظيع بأجسامهم و الترهلات 

بينما لو تأكلين بكمية معتدلة وتحترمين 
جوعك ومعدتك بعيد عن الارقام وقريب من الفائدة 

بتحصلين ان نفسيتك انتعشت بدون مبالغه 

لأنك عشتي نظام وحياة ممتازة وعادله 

تأكلين بكمية تكفيك

تتمرنين بشكل اقل 

وتحصلين على نتايج عاليه جداً 

ولو رجعنا لمعادلتنا و اكلتي دجاج مشوية عن قطعة كتكات راح تستفيدين من قيمتها غذائيا وراح تسوين توازن و تأثير كبير بعملية الايض وهذا هو المطلوب

 أن زان معدل الايض عندك زان جسمك وسهل التحكم فيه .

الزبيب يسمن او ينحف؟

طيب بما ان احياننا تجيني اسأله عن بعض الاكل وهذا الاكل ينحف وهذا يسمن 

او تجيك وحده تبيع لخلطه وتقول انها تكبر شي وتصغر شي 

( وهذا نظريه سطحيه برائي ولا انتقص من شأن احد بس اتكلم من وجهة نظري الواقعيه )

 مافيه شي اسمه اكله تنحف ولا فيه اكله تسمن .. مافيه اكل للسمين ولا فيه اكل للنحيف

او للي بيكبر بالمنطقه الفلانيه وينحت المنطقه الفلانيه فيه .

هي على كمية الاكل اللي تأكلينها وتستهلكينه بشكل يومي 

لو بأكل يوميا حبة بطاطا حلوه مشويه 

باخذها كقيمه اضافيه لغذائي وراح تمدني بالطاقه والبروتين 

بينما لو بالغت منها باليوم ثلاث راح يزيد وزني .. ولو اكلت منها نص قطعه راح ينحف وزني  

لو اعتدلت بالموضوع راح اكسبها لصالحي و بستفيد منها اكيد .

المبالغه حالها حال التقصير بالشي .. لو اخذت ست برتقالات وسويت مناه عصير هنا بأخذ عصارته فقط 

وبتركك فوائد الالياف وبيكون نسبة السكر الطبيعي فيه عاليه جدا جدا جدا 

لاني عصرت ست برتقالات بكوب واحد فالنتيجه بتنقلب ضدي .. ولو اخترت اني اكل برتقاله وحده بتكون انفع لي من ست بكوب واحد 

" خيارات بسيطه ولكنها ذكيه .. وتضيف لك الفرق  " 

وقبل ما انهي الموضوع سؤال اخير بطرحه لكم والرد لأنفسكم

هل من المعقول بتكملون طيلة عمركم بنظام محدد يقيدك ويربط شهيتكم  ؟

والقرار مفتوح لكم

انتهى

joyce